କନକବ୍ୟୁରୋ : ଭାରତ ପକ୍ଷରୁ ନେଦରଲ୍ୟାଣ୍ଡର ହେଗ୍‌ରେ ବେଆଇନ ଭାବେ ଗଠିତ ହୋଇଥିବା ଅନ୍ତର୍ଜାତୀୟ ମଧ୍ୟସ୍ଥତା କୋର୍ଟ (ସିଓଏ)ର ସିନ୍ଧୁ ଜଳ ଚୁକ୍ତିନାମା ସମ୍ପର୍କରେ ସଦ୍ୟତମ ରାୟକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଛି। ଭାରତ ସ୍ପଷ୍ଟ ଭାବରେ କହିଛି ଯେ, ଏହି କୋର୍ଟ ବେଆଇନ ଭାବରେ ଗଠିତ ହୋଇଛି ଏବଂ ଏହାର କୌଣସି ଆଇନଗତ ଅସ୍ତିତ୍ୱ ନାହିଁ। ତେଣୁ, ଭାରତ ଏହାର କୌଣସି ରାୟ, ଆଦେଶ କିମ୍ବା କାର୍ଯ୍ୟକୁ ସ୍ୱୀକାର କରିବ ନାହିଁ ।

ଗଣମାଧ୍ୟମର ପ୍ରଶ୍ନର ଉତ୍ତର ଦେଇ, ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, ସିନ୍ଧୁ ଜଳ ଚୁକ୍ତିନାମା ଅନ୍ତର୍ଗତ ସର୍ବାଧିକ ଜଳଭଣ୍ଡାର ସହିତ ଜଡିତ ମାମଲାରେ ବେଆଇନ ଭାବରେ ଗଠିତ ତଥାକଥିତ ମଧ୍ୟସ୍ଥତା କୋର୍ଟ ୧୫ମେ’ ୨୦୨୬ ରେ ଏକ ରାୟ ଜାରି କରିଛନ୍ତି। ପୂର୍ବ ସମସ୍ତ ରାୟ ଭଳି ଭାରତ ଏହି ରାୟକୁ ସମ୍ପୂର୍ଣ୍ଣ ଭାବରେ ପ୍ରତ୍ୟାଖ୍ୟାନ କରୁଛି। ଭାରତ କେବେବି ଏହି କୋର୍ଟର ପ୍ରତିଷ୍ଠାକୁ ସ୍ୱୀକୃତି ଦେଇନାହିଁ। ତେଣୁ, ଏହି କୋର୍ଟର ଯେକୌଣସି କାର୍ଯ୍ୟପନ୍ଥା, ନିଷ୍ପତ୍ତି କିମ୍ବା ନିର୍ଦ୍ଦେଶର କୌଣସି ଆଇନଗତ ଗୁରୁତ୍ୱ ନାହିଁ ଏବଂ ଏହା ସମ୍ପୂର୍ଣ୍ଣ ବେଆଇନ।

ବୈଦେଶିକ ମନ୍ତ୍ରଣାଳୟ ସ୍ପଷ୍ଟ କରିଛି ଯେ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବାର ଭାରତର ନିଷ୍ପତ୍ତି ବଳବତ୍ତର ରହିଛି। ୧୯ ସେପ୍ଟେମ୍ବର ୧୯୬୦ରେ ଭାରତ ଏବଂ ପାକିସ୍ତାନ ମଧ୍ୟରେ ସ୍ୱାକ୍ଷରିତ ଏହି ଚୁକ୍ତିନାମା ସିନ୍ଧୁ ନଦୀ ପ୍ରଣାଳୀର ଜଳ ବ୍ୟବହାରକୁ ନିୟନ୍ତ୍ରଣ କରେ। ଭାରତ ଅନ୍ତର୍ଜାତୀୟ ଆଇନ ଅନୁଯାୟୀ ଏହାର ସାର୍ବଭୌମ ଅଧିକାର ବ୍ୟବହାର କରିଥିଲା ଏବଂ ଗତ ବର୍ଷ ପହଲଗାମ ଆତଙ୍କବାଦୀ ଆକ୍ରମଣ ପରେ ଚୁକ୍ତିନାମାକୁ ସ୍ଥଗିତ କରିଥିଲା।

ଭାରତ କହିଛି ଯେ, ପାକିସ୍ତାନ ସୀମାପାର ଆତଙ୍କବାଦ ପାଇଁ ସମର୍ଥନ ବନ୍ଦ ନ କରିବା ପର୍ଯ୍ୟନ୍ତ ଚୁକ୍ତିନାମା ସ୍ଥଗିତ ରହିବ। ସାର୍ବଭୌମ ଅଧିକାର ଉପରେ ପ୍ରଶ୍ନ ଉଠାଇବାର ଅଧିକାର ନାହିଁ ବୋଲି ଭାରତ ରୋକଠୋକ୍ କହିଛି। ବୈଦେଶିକ ମନ୍ତ୍ରଣାଳୟ ମଧ୍ୟ ଜୁନ୍ ୨୦୨୫ରେ ସ୍ପଷ୍ଟ ଭାବରେ କହିଥିଲା ଯେ ଚୁକ୍ତିନାମା ସ୍ଥଗିତ ଥିବା ସମୟରେ ଭାରତ ଚୁକ୍ତିନାମା ଅନୁଯାୟୀ କୌଣସି ଦାୟିତ୍ୱ ପାଳନ କରିବାକୁ ବାଧ୍ୟ ନୁହେଁ। ଭାରତ କହିଛି, କୌଣସି ମଧ୍ୟସ୍ଥତା ଅଦାଲତ, ବିଶେଷକରି ବେଆଇନ ଭାବରେ ଗଠିତ କୋର୍ଟ, ଭାରତର ସାର୍ବଭୌମ ଅଧିକାର ଅଧୀନରେ ନିଆଯାଇଥିବା କାର୍ଯ୍ୟର ଆଇନଗତ ସ୍ଥିତି ଉପରେ ପ୍ରଶ୍ନ ଉଠାଇପାରିବ ନାହିଁ।

ଗତ ବର୍ଷ, ବୈଦେଶିକ ବ୍ୟାପାର ମନ୍ତ୍ରଣାଳୟ ଜମ୍ମୁ ଏବଂ କାଶ୍ମୀରର କିଶନଗଙ୍ଗା ଏବଂ ରାଟଲେ ଜଳବିଦ୍ୟୁତ୍ ପ୍ରକଳ୍ପ ଉପରେ ଏହାର କ୍ଷେତ୍ରାଧିକାର ସମ୍ପର୍କରେ ଏକ ‘ସପ୍ଲିମେଣ୍ଟାଲ ଆୱାର୍ଡ’ଜାରି କରି ତଥାକଥିତ ମଧ୍ୟସ୍ଥତା କୋର୍ଟକୁ ସମାଲୋଚନା କରିଥିଲା। ଭାରତ ସେତେବେଳେ କହିଥିଲା ଯେ ଏହା କେବେବି ଏହି ତଥାକଥିତ କୋର୍ଟର ଆଇନଗତ ଅସ୍ତିତ୍ୱକୁ ସ୍ୱୀକାର କରେନାହିଁ। ଭାରତ ଅନୁଯାୟୀ, ଏହି ମଧ୍ୟସ୍ଥତା ସଂସ୍ଥା ଗଠନ ହିଁ ସିନ୍ଧୁ ଜଳ ଚୁକ୍ତିନାମାର ଏକ ଗମ୍ଭୀର ଉଲ୍ଲଂଘନ ଏବଂ ଏହା ଅଧୀନରେ ହୋଇଥିବା ସମସ୍ତ କାର୍ଯ୍ୟ ଏବଂ ନିଷ୍ପତ୍ତି ବେଆଇନ। ଭାରତ ପାକିସ୍ତାନ ଉପରେ ଅନ୍ତର୍ଜାତୀୟ ମଞ୍ଚର ଅପବ୍ୟବହାର କରୁଥିବାର ଅଭିଯୋଗ ଆଣିଛି। ବୈଦେଶିକ ମନ୍ତ୍ରଣାଳୟ କହିଛି ଯେ, ପାକିସ୍ତାନର ଏହି ‘ବେଆଇନ ମଧ୍ୟସ୍ଥତା ପ୍ରକ୍ରିୟା’ ଏହାର ଦୀର୍ଘକାଳୀନ ପ୍ରତାରଣା ଏବଂ ଅନ୍ତର୍ଜାତୀୟ ମଞ୍ଚର ଅପବ୍ୟବହାର ନୀତିର ଏକ ଅଂଶ। ଭାରତ ଏହା ମଧ୍ୟ କହିଛି ଯେ, ଏପରି କାର୍ଯ୍ୟ ମାଧ୍ୟମରେ, ପାକିସ୍ତାନ ଆତଙ୍କବାଦର ଏକ ବିଶ୍ୱବ୍ୟାପୀ କେନ୍ଦ୍ର ଭାବରେ ନିଜର ଦାୟିତ୍ୱକୁ ଏଡାଇବାକୁ ଚେଷ୍ଟା କରୁଛି।