କନକବ୍ୟୁରୋ : ଜର୍ମାନୀର ଫ୍ରାଙ୍କଫର୍ଟରୁ ହାଇଦ୍ରାବାଦ ଆସୁଥିବା ଲୁଫ୍ତହଂସା ଏୟାରଲାଇନ୍ସର ଏକ ବିମାନରେ ବୋମା ଥିବା ନେଇ ଇମେଲ ମାଧ୍ୟମରେ ଧମକ ମିଳିବା ପରେ ଆତଙ୍କ ଖେଳିଯାଇଛି। କଡ଼ା ସୁରକ୍ଷା ଭିତରେ ବିମାନ ହାଇଦ୍ରାବାଦର ରାଜୀବ ଗାନ୍ଧୀ ଆନ୍ତର୍ଜାତିକ ବିମାନବନ୍ଦରରେ ଅବତରଣ କରିଥିଲା। ବିମାନବନ୍ଦର ସୂତ୍ରରୁ ‘ଇଣ୍ଡିଆ ଟୁଡେ’ ପ୍ରକାଶ କରିଛି ଯେ, ଏୟାରଲାଇନ୍ସର କଷ୍ଟମର୍‌ ସପୋର୍ଟକୁ ମିଳିଥିବା ଇ-ମେଲ୍‌ରେ ବିମାନ ଏଲ୍‌ଏଚ୍‌-୭୫୪ରେ ବୋମା ଥିବା ଦାବି କରାଯାଇଥିଲା।

ବିମାନଟି ସମଶାବାଦରେ ପହଞ୍ଚିବା ପୂର୍ବରୁ ଏଥିରେ ବିସ୍ଫୋରଣ କରାଯିବ ବୋଲି ଧମକ ଦିଆଯାଇଥିଲା। ସୁରକ୍ଷା ଏଜେନ୍ସି ତୁରନ୍ତ ଆଲର୍ଟରେ ଥିବାବେଳେ ଜରୁରୀକାଳୀନ ପ୍ରୋଟୋକଲ ଆରମ୍ଭ କରାଯାଇଥିଲା। ବିମାନଟି ସୁରକ୍ଷିତ ଭାବରେ ବିମାନବନ୍ଦରରେ ଅବତରଣ କରିବା ପରେ ବିମାନର ସୁରକ୍ଷା ଯାଞ୍ଚ ପାଇଁ ଆଇସୋଲେସନ ବେକୁ ସ୍ଥାନାନ୍ତର କରାଯାଇଥିଲା। ବୋମା ନିଷ୍କ୍ରିୟକାରୀ ଦଳ ଓ ବିମାନବନ୍ଦର ସୁରକ୍ଷା କର୍ମଚାରୀ ବିମାନର ତନ୍ନ ତନ୍ନ କରି ଯାଞ୍ଚ କରିଥିଲେ। ବିମାନର ଯାଞ୍ଚ ଚାଲିଥିବାବେଳେ ଏପର୍ଯ୍ୟନ୍ତ ବୋମା ଥିବା ଖବର ସ୍ପଷ୍ଟ ହୋଇପାରିନାହିଁ। 

ଏକ ପୃଥକ୍‌ ଘଟଣାକ୍ରମରେ ପ୍ରବଳ ପବନ ଜନିତ ପ୍ରତିକୂଳ ପାଣିପାଗ ଯୋଗୁ ସମଶାବାଦ ବିମାନବନ୍ଦରକୁ ଆସୁଥିବା ଦୁଇଟି ବିମାନ ଅବତରଣ କରିପାରିନଥିଲେ। ପୁଣେରୁ ଆସୁଥିବା ଏକ ବିମାନକୁ ବିଜୟୱାଡା ବିମାନବନ୍ଦର ଅଭିମୁଖେ ପଠାଯାଇଥିଲା ଓ ଦୁବାଇରୁ ଆସୁଥିବା ଏକ ଏମିରେଟ୍ସ ବିମାନକୁ ବେଙ୍ଗାଲୁରୁକୁ ପଠାଯାଇଥିଲା। ସୂତ୍ର ଅନୁଯାୟୀ ଦୁଇଟି ଯାକ ବିମାନ ସମଶାବାଦ ବିମାନବନ୍ଦରରେ ଦୁଇଥର ଅବତରଣ କରିବାକୁ ଚେଷ୍ଟା କରିଥିଲେ, କିନ୍ତୁ ଅତ୍ୟଧିକ ପବନ ଯୋଗୁ ବିମାନ ଦୁଇଟି ଅବତରଣ କରିପାରିନଥିଲେ।