କନକ ବ୍ୟୁରୋ: ପଶ୍ଚିମବଙ୍ଗ ନିର୍ବାଚନରେ TMCର ଶୋଚନୀୟ ପରାଜୟ ଏବଂ ଦଳ ମଧ୍ୟରେ ଦେଖାଦେଇଥିବା ଆନ୍ତରିକ ଅସନ୍ତୋଷ ପରେ ପୂର୍ବ ମୁଖ୍ୟମନ୍ତ୍ରୀ ତଥା ଟିଏମସି ସୁପ୍ରିମୋ ମମତା ବାନାର୍ଜୀ ନିଜର କଡ଼ା ଆଭିମୁଖ୍ୟ ଜାହିର କରିଛନ୍ତି । ଅସନ୍ତୁଷ୍ଟ ନେତା ଓ କର୍ମୀମାନଙ୍କୁ ସ୍ପଷ୍ଟ ଚେତାବନୀ ଦେଇ କହିଛନ୍ତି ଯେ, “ଯେଉଁମାନେ ଦଳ ଛାଡିବାକୁ ଚାହୁଁଛନ୍ତି, ସେମାନେ ଯାଇପାରନ୍ତି; ମୁଁ ଦଳକୁ ନୂଆ କରି ଗଢ଼ିବି ।” ଏହି ବୟାନ ପରେ ଦଳ ଭିତରେ ହଇଚଇ ଦେଖିବାକୁ ମିଳିଛି ।

ନିକଟରେ ହୋଇଥିବା ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପି ଠାରୁ ତୃଣମୂଳ କଂଗ୍ରେସ ପରାସ୍ତ ହୋଇଛି, ଆଉ ଏତେ ବଡ଼ ଝଟକାରୁ ମୁକୁଳିପାରିନି ଦିଦିଙ୍କ ଦଳ । ୨୯୪ଟି ଆସନ ବିଶିଷ୍ଟ ବିଧାନସଭାରେ ଟିଏମସି ମାତ୍ର ୮୦ଟି ଆସନ ପାଇବାରେ ସଫଳ ହୋଇଥିବାବେଳେ ମମତା ବାନାର୍ଜୀ ନିଜେ ତାଙ୍କର ପାରମ୍ପରିକ ଗଡ଼ ଭବାନୀପୁର ଆସନକୁ ବି ବଞ୍ଚାଇ ପାରିନଥିଲେ । ଏହି ପରାଜୟ ପରେ ଦଳର ସ୍ଥିତି ଦୋହଲି ଯାଇଛି ଏବଂ ଅନେକ ନେତା ଅନ୍ୟ ଦଳକୁ ଯିବା ପାଇଁ ସୁଯୋଗ ଖୋଜୁଥିବା ଚର୍ଚ୍ଚା ହେଉଛି । କାଳୀଘାଟସ୍ଥିତ ନିଜ ବାସଭବନରେ ଆୟୋଜିତ ସମୀକ୍ଷା ବୈଠକରେ ମମତା ବାନାର୍ଜୀ ଦଳୀୟ ପ୍ରାର୍ଥୀ ଓ ନେତାମାନଙ୍କୁ ସମ୍ବୋଧିତ କରିଥିଲେ । ସେ ସ୍ପଷ୍ଟ କରିଛନ୍ତି ଯେ, ଦଳର ସଙ୍କଟ ସମୟରେ ଯେଉଁମାନେ ବିଶ୍ୱାସଘାତକତା କରିବାକୁ ଚାହୁଛନ୍ତି ବା ଅନ୍ୟ କୌଣସି ବାଧ୍ୟବାଧକତାରେ ଦଳ ଛାଡିବାକୁ ଚାହୁଛନ୍ତି, ସେମାନଙ୍କୁ ସେ ଜବରଦସ୍ତି ରଖିବେ ନାହିଁ । ସେ କହିଛନ୍ତି, “ଯେଉଁମାନେ ଅନ୍ୟ ଦଳକୁ ଯାଉଛନ୍ତି, ସେମାନଙ୍କୁ ଯିବାକୁ ଦିଅନ୍ତୁ । ମୁଁ କାହାକୁ ଜୋରଜବରଦସ୍ତି ଧରି ରଖିବାକୁ ଚାହେନାହିଁ ।

ଖାଲି ଏତିକି ନୁହେଁ ସେ ଜନସାଧାରଣଙ୍କ ଜନାଦେଶକୁ ‘ଲୁଟ୍’ କରାଯାଇଛି ବୋଲି ଅଭିଯୋଗ କରିବା ସହ ଟିଏମସି କେବେହେଲେ ମୁଣ୍ଡ ନୁଆଁଇବ ନାହିଁ ବୋଲି ଦମ୍ଭୋକ୍ତି ପ୍ରକାଶ କରିଛନ୍ତି ଦିଦି । ସେ ଦଳୀୟ କର୍ମୀଙ୍କୁ ଭୟଭୀତ ନହେବାକୁ ଏବଂ ତୃଣମୂଳ ସ୍ତରରୁ ପୁଣି ଲୋକଙ୍କ ସହ ଯୋଡ଼ିହେବାକୁ ଆହ୍ୱାନ ଦେଇଛନ୍ତି । ବୈଠକରେ ମମତା କିଭଳି ଦଳକୁ ଆଗକୁ ନେବେ, ସେନେଇ ନୂଆ ଯୋଜନା ମଧ୍ୟ ପ୍ରସ୍ତୁତ କରିଛନ୍ତି । ସେ କହିଛନ୍ତି, “ଯେଉଁମାନେ ଦଳରେ ରହୁଛନ୍ତି, ସେମାନେ ରାଜ୍ୟସାରା କ୍ଷତିଗ୍ରସ୍ତ ହୋଇଥିବା ଦଳୀୟ କାର୍ଯ୍ୟାଳୟଗୁଡ଼ିକୁ ପୁନର୍ବାର ଖୋଲନ୍ତୁ, ସେଗୁଡିକୁ ନୂଆ ରଙ୍ଗ ଦିଅନ୍ତୁ । ଯଦି ଆବଶ୍ୟକ ପଡ଼େ, ମୁଁ ନିଜେ ମଧ୍ୟ ରଙ୍ଗ କରିବି ।” ନିର୍ବାଚନ ସମୟରେ ଦଳୀୟ କର୍ମୀଙ୍କ ଉପରେ ହୋଇଥିବା ଅତ୍ୟାଚାର ଓ ଭୟର ବାତାବରଣ ସତ୍ତ୍ୱେ ଏହି ଲଢ଼େଇ ଜାରି ରହିବ ବୋଲି ସେ ଦୃଢ଼ତାର ସହ କହିଛନ୍ତି ।

ବଡ଼କଥା ହେଉଛି ଟିଏସିର ପରାଜୟ ପରେ ଦଳ ଭିତରେ ବିଦ୍ରୋହ କିମ୍ବା ନେତାମାନଙ୍କର ଦଳ ବଦଳ କରିବା ଆଶଙ୍କା ବହୁତ ବଢ଼ିଯାଇଛି । କିଛି ପ୍ରାର୍ଥୀ ଓ ନେତା ଏବେ ମଧ୍ୟ ଅସନ୍ତୁଷ୍ଟ ଅଛନ୍ତି । କିନ୍ତୁ ମମତା ବାନାର୍ଜୀ ଏହି ଚେତାବନୀ ମାଧ୍ୟମରେ ସେହି ସମସ୍ତ ନେତାଙ୍କୁ ସ୍ପଷ୍ଟ ସଂକେତ ଦେଇଛନ୍ତି ଯେ, ସେ ବ୍ଲାକମେଲିଂ ଆଗରେ ମୁଣ୍ଡ ନୁଆଁଇବେ ନାହିଁ । ଜଣେ ନେତା ଦଳ ଛାଡ଼ିଲେ ହଜାର ହଜାର ନୂଆ କର୍ମୀ ତିଆରି ହେବେ ଏବଂ ଟିଏମସି ପୁଣି ଥରେ ଫେରିବ ବୋଲି ସେ ଖୋଲାଖୋଲି କହିଛନ୍ତି ।