କନକ ବ୍ୟୁରୋ: ଦୀର୍ଘ ଦିନର ବ୍ୟବଧାନ ପରେ ପେଟ୍ରୋଲ ଏବଂ ଡିଜେଲ ଦରରେ ୩ ଟଙ୍କାର ବୃଦ୍ଧି ଘଟିଛି । କିନ୍ତୁ ଆପଣ ବୋଧେ ଜାଣିନାହାନ୍ତି ଏହି ୩ ଟଙ୍କା କେବଳ ‘ଟ୍ରେଲର’ ମାତ୍ର ଥିଲା । ବିଶେଷଜ୍ଞ ଏବଂ ତୈଳ କମ୍ପାନିଗୁଡ଼ିକର ସୂଚନା ଅନୁସାରେ, ଆଗକୁ ଏହି ଦର ୩୦ ଟଙ୍କା ପର୍ଯ୍ୟନ୍ତ ବଢ଼ିପାରେ । କାହିଁକି ଏମିତି କୁହାଯାଉଛି? କ’ଣ ରହିଛି କାରଣ ଆସନ୍ତୁ ଜାଣିବା…

ଦେଶରେ ମହଙ୍ଗା ମାଡ଼ର ପୁଣି ଏକ ନୂଆ ଅଧ୍ୟାୟ ଆରମ୍ଭ ହୋଇଛି । ଶୁକ୍ରବାର ସକାଳୁ ସକାଳୁ ତୈଳ କମ୍ପାନିଗୁଡ଼ିକ ପେଟ୍ରୋଲ ଲିଟର ପିଛା ପ୍ରାୟ ୩.୧୪ ଟଙ୍କା ଏବଂ ଡିଜେଲ ୩.୧୧ ଟଙ୍କା ବଢ଼ାଇଛନ୍ତି । ଦିଲ୍ଲୀରୁ ଭୁବନେଶ୍ୱର ପର୍ଯ୍ୟନ୍ତ, ପ୍ରତିଟି ସହରରେ ଖାଉଟିଙ୍କ ପକେଟ୍ ଉପରେ ଚଡ଼କ ପଡ଼ିଛି । କିନ୍ତୁ ଅସଲ ସମସ୍ୟା ଏହି ୩ ଟଙ୍କାରେ ସୀମିତ ନାହିଁ । କିଛି ଜାତୀୟ ଗଣମାଧ୍ୟମ ଏବଂ ଅର୍ଥନୈତିକ ବିଶେଷଜ୍ଞଙ୍କ ମତରେ, ଏହା ହେଉଛି ଅହେତୁକ ‘ପ୍ରାଇସ୍ ହାଇକ୍’ର ଆରମ୍ଭ ।

କାହିଁକି ବଢ଼ୁଛି ଦାମ୍?

ଇରାନ ଏବଂ ଆମେରିକା ମଧ୍ୟରେ ବଢ଼ୁଥିବା ଉତ୍ତେଜନା
ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ବ୍ୟାରେଲ ପିଛା ୧୦୫ ଡଲାର ଅତିକ୍ରମ କରିଛି
ସାମୁଦ୍ରିକ ପରିବହନ ବାଧାପ୍ରାପ୍ତ ହେବାରୁ ଯୋଗାଣରେ ସମସ୍ୟା

ତେଲ କମ୍ପାନି ଗୁଡ଼ିକଙ୍କ କହିବା କଥା ହେଉଛି, ସେମାନେ ଗତ କିଛି ମାସ ହେବ କ୍ଷତି ସହି ତେଲ ବିକ୍ରି କରୁଥିଲେ । ଦୈନିକ ପ୍ରାୟ ୧୦୦୦ କୋଟି ଟଙ୍କାର ‘ଅଣ୍ଡର-ରିକଭରି’ ବା କ୍ଷତି ସହୁଛନ୍ତି । ବର୍ତ୍ତମାନର ଗ୍ଲୋବାଲ ମାର୍କେଟ୍ ସ୍ଥିତିକୁ ଦେଖିଲେ, କମ୍ପାନି ଗୁଡ଼ିକୁ ସେମାନଙ୍କ କ୍ଷତି ଭରଣା କରିବା ପାଇଁ ଅତିକମରେ ୨୫ରୁ ୩୦ ଟଙ୍କା ପର୍ଯ୍ୟନ୍ତ ଦର ବୃଦ୍ଧି କରିବାକୁ ପଡ଼ିବ । ଯଦି ପେଟ୍ରୋଲ ଏବଂ ଡିଜେଲ ଦରରେ ଏହି ବୃଦ୍ଧି ଜାରି ରହେ, ତେବେ ଏହାର ପ୍ରଭାବ କେବଳ ଗାଡ଼ି ମାଲିକଙ୍କ ଉପରେ ପଡ଼ିବ ନାହିଁ । ଡିଜେଲ ଦର ବଢ଼ିଲେ ପରିବହନ ଖର୍ଚ୍ଚ ବଢ଼ିବ । ଯାହାଫଳରେ…

୧. ପନିପରିବା ଏବଂ ଖାଦ୍ୟଶସ୍ୟ ଦର ଆକାଶଛୁଆଁ ହେବ
୨. ଅନଲାଇନ୍ ଡେଲିଭରି ଏବଂ କ୍ୟାବ୍ ସେବା ମହଙ୍ଗା ହେବ
୩. ଶିଳ୍ପ କ୍ଷେତ୍ରରେ ଉତ୍ପାଦନ ଖର୍ଚ୍ଚ ବଢ଼ିବ, ଯାହା ସାଧାରଣ ବ୍ୟବହାର୍ଯ୍ୟ ଜିନିଷର ଦାମ୍ ବଢ଼ାଇବ

ଗତ କିଛି ଦିନ ତଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ‘ତେଲ କମ୍ ଖର୍ଚ୍ଚ କରିବାକୁ’ ଆହ୍ୱାନ କରିଥିଲେ । ମେଟ୍ରୋ ବ୍ୟବହାର ଏବଂ ସମ୍ଭବ ହେଲେ ‘ୱର୍କ ଫ୍ରମ୍ ହୋମ୍’ କରିବାକୁ ପରାମର୍ଶ ଦେଇଥିଲେ । ଏହା ସ୍ପଷ୍ଟ ସଙ୍କେତ ଥିଲା ଯେ ସରକାର ଆଗକୁ ଏକ ବଡ଼ ଆର୍ଥିକ ଚ୍ୟାଲେଞ୍ଜ ପାଇଁ ପ୍ରସ୍ତୁତ ହେଉଛନ୍ତି । ଅନ୍ୟପଟେ ବିରୋଧୀ ଦଳଗୁଡ଼ିକ ଏହାକୁ ନେଇ ସରକାରଙ୍କୁ ଘେରିବା ଆରମ୍ଭ କଲେଣି । ବିରୋଧୀ ଦଳନେତା ରାହୁଲ ଗାନ୍ଧୀ କହିଛନ୍ତି ଯେ, “୩ ଟଙ୍କା ତ କେବଳ କିସ୍ତିର ଆରମ୍ଭ, ଅସଲ ବସୁଲି ଏବେ ବାକି ଅଛି ।

ଏବେ କ’ଣ ରହିଛି ବିକଳ୍ପ?

ଇଲେକ୍ଟ୍ରିକ୍ ଗାଡ଼ିର ବ୍ୟବହାର ବଢ଼ାଇବା
ପବ୍ଲିକ୍ ଟ୍ରାନ୍ସପୋର୍ଟ ଉପରେ ନିର୍ଭର କରିବା
ସରକାରଙ୍କ ପକ୍ଷରୁ ଏକ୍ସସାଇଜ୍ ଡ୍ୟୁଟିରେ ହ୍ରାସ (ଯଦିଓ ଏହାର ସମ୍ଭାବନା କମ୍)

ଓଡ଼ିଶାରେ ମଧ୍ୟ ପେଟ୍ରୋଲ ଦର ୧୦୪ ଟଙ୍କା ଟପି ସାରିଛି । ଭୁବନେଶ୍ୱରରୁ ବରଗଡ଼ ପର୍ଯ୍ୟନ୍ତ ଗ୍ରାହକ ଏବେ ଚିନ୍ତାରେ । ଯଦି ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ନିୟନ୍ତ୍ରଣକୁ ନଆସେ, ତେବେ ଖୁବ୍ ଶୀଘ୍ର ଆମକୁ ଦୈନିକ ଭିତ୍ତିରେ ୫୦ ପଇସାରୁ ୧ ଟଙ୍କା ପର୍ଯ୍ୟନ୍ତ ବୃଦ୍ଧି ଦେଖିବାକୁ ମିଳିପାରେ, ଯାହା ଶେଷରେ ୩୦ ଟଙ୍କାର ସେହି ଭୟଙ୍କର ଆକଳନ ପାଖକୁ ନେଇଯିବ । ତେବେ ସ୍ପଷ୍ଟ ଭାବେ କହିଲେ, ଆଗାମୀ ଦିନଗୁଡ଼ିକ ସାଧାରଣ ଖାଉଟିଙ୍କ ପାଇଁ ବହୁତ କଷ୍ଟକର ହେବାକୁ ଯାଉଛି । ୩ ଟଙ୍କାର ଏହି ଝଟକା ହୁଏତ ଏକ ବଡ଼ ଝଡ଼ର ପୂର୍ବାଭାସ ।