କନକ ବ୍ୟୁରୋ : କ୍ରିକେଟ୍ ପଡ଼ିଆରେ ଅନେକ ବଡ଼ ବଡ଼ ବୋଲରଙ୍କୁ ମୁକାବିଲା କରୁଥିବା ଖେଳାଳି ହଠାତ୍ ଯଦି ଜଣେ ୯ ବର୍ଷର ଶିଶୁ ପାଖରେ ହାର ମାନିଯାଆନ୍ତି, ତେବେ ତାହା ଚର୍ଚ୍ଚାର ବିଷୟ ହେବ ନାହିଁ ତ ଆଉ କ’ଣ ହେବ? ପାକିସ୍ତାନ କ୍ରିକେଟ୍ ଟିମର ଷ୍ଟାର୍ ଅଲରାଉଣ୍ଡର ସାମ ଅୟୁବ୍ ଏବେ ସୋସିଆଲ୍ ମିଡିଆରେ ଟ୍ରୋଲ୍‌ର ଶିକାର ହୋଇଛନ୍ତି । କାରଣ ହେଉଛି ଗୋଟିଏ ଭିଡିଓ ଯେଉଁଥିରେ ସେ ଜଣେ ୯ ବର୍ଷର ଶିଶୁର ବଲ୍‌ରେ କ୍ଲିନ୍ ବୋଲ୍ଡ ହୋଇଯାଇଛନ୍ତି। ୨୩ ବର୍ଷୀୟ ସାମ ଅୟୁବ୍ ପାକିସ୍ତାନ ଦଳର ଜଣେ ପ୍ରତିଭାବାନ ଖେଳାଳି ଭାବେ ପରିଚିତ । କିନ୍ତୁ କିଛି ଦିନ ହେବ ଖରାପ ଫର୍ମ ତାଙ୍କ ପାଇଁ ମୁଣ୍ଡବିନ୍ଧାର କାରଣ ପାଲଟିଛି। ଟି-୨୦ ବିଶ୍ୱକପ୍ ପରଠାରୁ ତାଙ୍କ ବ୍ୟାଟ୍‌ରୁ ରନ୍ ବାହାରୁନାହିଁ। ଏହାରି ଭିତରେ, ପିଲାମାନଙ୍କ ସହ ପ୍ରାକ୍ଟିସ୍ କରୁଥିବା ବେଳର ଏହି ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି।

ଆଗକୁ ପଢ଼ନ୍ତୁ : ଦିନେ ସଚ୍ଚିନଙ୍କ ସହ ପଡ଼ିଆରେ ଖେଳୁଥିଲେ, ସାହସ ଭାଙ୍ଗିଦେଲା ବାପା-ମା’ଙ୍କ ବିୟୋଗ;ଡିପ୍ରେସନରେ ଦିନ କାଟୁଛନ୍ତି ସଚ୍ଚିନଙ୍କ ସାଙ୍ଗ

ଭିଡିଓରେ ଦେଖିବାକୁ ମିଳୁଛି ଯେ ସାମ ଅୟୁବ୍ ନିଜ ପ୍ରାକ୍ଟିସ୍ ଅଧିବେଶନରେ ବ୍ୟାଟିଂ କରୁଛନ୍ତି। ତାଙ୍କ ସହ ବୋଲିଂ କରିବା ପାଇଁ ଅନେକ ଛୋଟ ପିଲା ଧାଡ଼ି ବାନ୍ଧି ଛିଡ଼ା ହୋଇଛନ୍ତି। ଏହି ସମୟରେ ଜଣେ ୯ ବର୍ଷର ଶିଶୁ ଏପରି ଏକ ଜବରଦସ୍ତ ବଲ୍ ପକାଇଲେ ଯେ, ସାମ ଅୟୁବ୍ ସମ୍ପୂର୍ଣ୍ଣ ଭାବେ ଚକିତ ହୋଇଗଲେ ଏବଂ ତାଙ୍କ ଷ୍ଟମ୍ପ ଉଡ଼ିଗଲା। କହିବାକୁ ଗଲେ, ସେ ବଲ୍‌ଟିକୁ ବୁଝିବାକୁ ମଧ୍ୟ ସକ୍ଷମ ହୋଇନଥିଲେ। ବୋଲ୍ଡ ହେବା ପରେ ସାମ ଅୟୁବ୍ ନିଜେ ସେହି ଛୋଟପିଲାଙ୍କ ପ୍ରଶଂସା କରିଥିଲେ ଏବଂ ହସି ହସି ତାକୁ ଉତ୍ସାହିତ କରିବା ପାଇଁ ତାଳି ମଧ୍ୟ ମାରିଥିଲେ । କିନ୍ତୁ କ୍ରିକେଟ୍ ପ୍ରେମୀଙ୍କ ମହଲରେ ଏହି ଭିଡିଓକୁ ନେଇ କଟାକ୍ଷ ଆରମ୍ଭ ହୋଇଯାଇଛି। କେବଳ ଏହି ଭିଡିଓ ନୁହେଁ, ସାମ ଅୟୁବ୍‌ଙ୍କ ବର୍ତ୍ତମାନର ପ୍ରଦର୍ଶନ ମଧ୍ୟ ନୈରାଶ୍ୟଜନକ। ପାକିସ୍ତାନ ସୁପର ଲିଗ୍‌ରେ ହାଇଦ୍ରାବାଦ କିଙ୍ଗ୍‌ସମ୍ୟାନ୍ ପକ୍ଷରୁ ଖେଳୁଥିବା ସାମ ୧୩ଟି ମ୍ୟାଚ୍‌ରେ ମାତ୍ର ୨୫୮ ରନ୍ କରିଥିଲେ। ତାଙ୍କର ହାରାହାରି ରନ୍ ମାତ୍ର ୨୧ ଏବଂ ଷ୍ଟ୍ରାଇକ୍ ରେଟ୍ ୧୧୯ ରହିଛି। ୧୨.୬ କୋଟି ଟଙ୍କାରେ ରିଟେନ୍ ହୋଇଥିବା ଏହି ଖେଳାଳିଙ୍କୁ ନେଇ ଏବେ ଚାରିଆଡ଼େ ପ୍ରଶ୍ନ ଉଠୁଛି।

ପାକିସ୍ତାନ ପାଇଁ ତିନୋଟି ଯାକ ଫର୍ମାଟ୍‌ରେ ଖେଳିଥିବା ସାମ ଟେଷ୍ଟ ଓ ଟି-୨୦ରେ ସେତେଟା ସଫଳ ହୋଇନାହାନ୍ତି। ତେବେ ଦିନିକିଆରେ ୪୬.୯୩ ହାରାହାରି ତାଙ୍କ ପାଇଁ ଏକମାତ୍ର ଆଶ୍ୱାସନାର ବିଷୟ। କ୍ରିକେଟରେ ଫର୍ମ ଆସେ ଆଉ ଯାଏ କିନ୍ତୁ ଜଣେ ଷ୍ଟାର୍ ଖେଳାଳି ଯେତେବେଳେ ଏପରି ଭାବେ ଛୋଟ ପିଲାଙ୍କଠାରୁ ହାରନ୍ତି, ତାହା ଖେଳାଳିଙ୍କ ଆତ୍ମବିଶ୍ୱାସ ଉପରେ ପ୍ରଶ୍ନ ଚିହ୍ନ ଲଗାଇଦିଏ। ସାମ ଅୟୁବ୍ ଖୁବ୍ ଶୀଘ୍ର ନିଜର ପୁରୁଣା ଫର୍ମକୁ ଫେରିବେ କି ନାହିଁ, ତାହା ଏବେ ଦେଖିବାକୁ ବାକି ରହିଲା।